بـــــــسم الله الرحمـــــــن الرحيـــــــم
كيف من الممكن أن يُسعِد كل من الزوجين الآخر بشئ بسيط قد يفوق سعادته عند شراء سيارة فاخرة أو منزل فاخر للطرف الآخر طالما كان يحلم به؟
الشئ البسيط دة ممكن يحسن العلاقة بين الزوجين بنسبة كبيرة جدا مهما حصل ما بينهم. لإنه بيلعب علي حتة النفسية. وأكيد معروف إن لو الواحد نفسه متفائلة ومبسوطة ممكن يعمل شغل عالي جداً.
الفكرة دي سمعتها في كتاب “The Compound Effect” ولقيتها فعلا جميلة جدا والحكمة ضالة المؤمن أنّى وجدها فهو أحق الناس به.
الفكرة ببساطة إن كل يوم كل من الطرف الآخر أو واحد منهم يعني يبدأ من غير ما يقول للطرف الآخر يكتب كل يوم ولو حاجة واحدة بس هو بيحبها في الطرف الآخر أو عجبته فيه أو موقف جميل ولو بسيط حتي لو مجرد ابتسامة أو أكلة حلوة.
وباعدين ييجي في آخر العام ممكن في مناسبة مثلا معينة يهدي للطرف الآخر الهدية دي وشوف مدي سعادة الطرف الآخر والحب المتبادل والتقدير اللي ممكن يحصل بعد الحدث دة.
بالنسبة للطرف اللي بيكتب هيبدأ يشوف كل يوم مزايا الطرف الآخر وبالتالي يزيد حبه وإحترامه ليه. وكدة كدة إحنا بننسي فيبقي نفتكر الحلو ونكتبه والوحش ننساه ومنكتبوش.
وكدة كدة في الأغلب كل واحد فيه عيوب بس الشطارة هو التغاضي عن العيوب والتركيز عالمحاسن بالذات في العلاقات. فتبقي علاقة ود وحب وإحترام وتقدير.
والله اعلم
و صَلَّى الله و سَلَّم وبارَك علي سيدنا مُحَمَّد وعلي آله
