بـــــــسم الله الرحمـــــــن الرحيـــــــم
كلام يبدو قاسي لكن دة اللي انا شايفه وقد أكون مخطئ نسبيا في بعض الحاجات.
عموم البلوي سواء من نصب أو إحتيال أو حتي تخلف أو عدم كفاءة في التعليم من أسبابه الجوهرية هو قلة وجود العقليات العلمية اللي تعرف إزاي تستخدم العلم اللي بتتعلمه لحل مشاكل حياتها اليومية بدلا من إنقطاع السياق في العلم في صورة حاجات متفرقة تقلل من حب الناس للعلم لعدم رؤية التكاملية فيه ولإنهم بيبقوا شايفينه شئ نظري لا تطبيق له إلا في نطاق ضيق سواء مجرد إستخدامه في العمل أو عشان أعدي الإمتحانات أو أي شئ آخر من النطاقات الضيقة.
اعتقد كتير أوي من مشاكل حياتك ممكن تتحل بالتفكير المنطقي السليم مع إستخدام الأدوات العلمية اللي اتعلمتها لحد ثانوية عامة علمي رياضة مش حتي جامعة.
عشان كدة تعلم مبادئ علم الرياضيات وعلم الإحتمالات والإحصاء والمنطق والبرمجة ممكن يساعدوك جدا إن شاء الله في عيش حياة كريمة بحيث تقلل من توترك والنصب والإحتيال اللي بتتعرضله سواء من ناس عايزين يستغلوك أو من ناس مش قصدهم يستغلوك لكن هم بيقولولك اللي يعرفوه واللي أحيانا قد يدمر حياتك.
طبعا اعتقد مهما عملت صعب تتجنب النصب والإحتيال وعدم الكفاءة بنسبة 100% لكن عالأقل ممكن نقول هتقلل نسبة تعرضك ليهم بشكل كبير جدا.
وطبعا أولا وآخرا توفيق الله قبل كل شئ وتيسيره وإنه يرزقك العقلية السليمة اللي تحب العلم النافع وتستعمله لمعرفة ربها سبحانه وتعالي ولنفع الناس.
والله اعلم
و صَلَّى الله و سَلَّم وبارَك علي سيدنا مُحَمَّد وعلي آله
