بـــــــسم الله الرحمـــــــن الرحيـــــــم
مقولة: شئ لم يوثق هو شئ لم يحدث
كتير ما بنسمع و بنتعلم حاجات مفيدة و تعجبنا و نتأثر مؤقتا و لكن ترجع ريما لعادتها القديمة. أصل المشكلة إننا بننسي و في حاجة اسمها منحني التذكر اللي في الصورة اللي تحت دي. يعني لو مثلا خدت محاضرة او سمعت حاجة مهمة و معملتش بيها ولا راجعتها خلال فترات معينة يبقي بنسبة كبيرة كإن ساعدتك محضرتش حاجة 
و إحنا في عصر المعلومات دة كمان بتزيد المعلومات جدا و بنبقي محتاجين نفتكر و مش ملاحقين طاب إيه الحل؟
الحل في مهارتين (5 ،6 التوثيق و التلخيص):
5 – نبتدي بمهارة التوثيق:
فكما قيل:
العلمُ صيدٌ والكِتَابةُ قيدُهُ قيِّد صيودَكَ بالحبالِ الواثِقَهْ
قيد صيودك لا تدعها طالقة
طبعا أي حاجة عايز تسترجعها محتاج تكون كاتبها او مسجلها صوت. في حالة إنك كاتبها محتاج تكتب بسرعة و تعرف تاخد ملاحظات سريعة و انت مركز في المحاضرة.
لو عايز تكتب بسرعة جدا عالكمبيوتر من غير ما تبص علي لوحة المفاتيح (Keyboard) في حاجة اسمها الكتابة السريعة (touch typing) اتكلمت عليها بالتفصيل في المقال دة
أما لو بتكتب بإيدك فمن خبرتي البسيطة: (الطريقة دي بفضل الله شغالة معاية كويس جدا)
1 – أنا بحاول أبقي مركز جدا في المحاضرة و باكتب و بالشكل دة بابقي مندمج لإني باعمل حاجة اسمها (التعلم النشط) (Active Learning) بحيث ابقي متجاوب و منفعل في المحاضرة فاستوعب اكتر و لو مش فاهم اسأل و لو المحاضر مش مديني وقت اكتب من كتر سرعته ممكن اكتب كلمات بسيطة شكلها مشغبط بس انا اعرف اقراها. طبعا الناس مش زي بعض و للقاعدة استثناءات بس دة بينفع معايا بدل مابقي قاعد كإني باتفرج علي فيلم و اروح ناسي
2 – و انا باكتب باسجل المحاضرة بالموبايل و لو حاجة ملحقتش اكتبها او افهمها ابص في الموبايل و اعرف الدقيقة رقم كام في التسجيل اللي باسجله و اكتب دقيقة التسجيل في الملاحظات
3 – و لما اروح احاول في اقرب وقت خلال 24 ساعة و غالبا بابقي فاكر التفاصيل اللي حوالين الشغبطة دي فبابيض المحاضرة و هي حاضرة في ذهني بخط حلو
4 – و الحاجات اللي فاتتني اسمعها برقم الدقيقة اللي كنت كاتبها في الملاحظات و ازودها اثناء التبييض بحيث ابقي حصلت علي قد ما اقدر
و إن شاء الله في المقال الجاي اتكلم عن مهارة التلخيص
للي ميعرفش التبييض هو إني اكتب المحاضرة بشكل منظم و جميل بعد المحاضرة و انا باذاكر
و الله أعلم
سبحانك اللهم و بحمدك اشهد ان لا إله إلا انت استغفرك و اتوب إليك
و صَلَّي الله و سَلَّم وبارَك علي سيدنا مُحَمَّد وعلي آله
