بـــــــسم الله الرحمـــــــن الرحيـــــــم
إن لم تسطع أن تلخص مضمون و جوهر ما تتعلم في 4 كلمات أو في جملة واحدة فانت غالبا لم تفهم بشكل كافي.
و يا لها من مهارة. و هي من أهم أهم أهم مهارات التعلم.
ليه هي مهمة أوي كدة:
1. لإنها بتساعدك تتأكد إذا كنت فاهم ولا بتضحك علي نفسك و بتلف و بتدور علي إنك فاهم و انت مش فاهم.
2. لأن غالبا لما حد بيشرح معلومة بيحشوها ببعض الأمثلة و التفريعات اللي تساعدك في إنك تفهم فكرة و جوهر و مضمون معين. فمهارة التلخيص بقي تساعدك تعرف الحاجات الجوهرية اللي من غيرها يضيع المضمون و إيه الأمثلة اللي وجودها في تلخيصك يضمن أنك تفتكر المضمون.
3. و التلخيص طبعا يساعدك علي الفهم العميق لإنك لو مش فاهم بعمق مش حتعرف تلخص.
4. و أحيانا ممكن تلخيصين يوصلوا لنفس النتيجة النهائية فنعرف إن التعبير عن نفس الفكرة ممكن يكون بكذة طريقة.
5. لما تيجي تراجع علي حاجة اسهل كتير و اوفر للوقت تراجعها من ملخصك عن إنك تراجعها من المصادر. فبالتالي يسهل عليك المراجعة علي الفترات اللي في الصورة دي فالمعلومات تنتقل إلي الذاكرة طويلة المدي. و دة رابط مصدر الصورة:
** و يمكن عشان توصل للجوهر محتاج تلخص التلخيص و تلخص التلخيص و هكذا لغاية ما يبقي عندك جملة فيها جوهر العلم و أساسه.
طاب نوضح شوية كمان مع ضرب الأمثلة:
فلو فرضنا إنك بتدرس في الكلية فلو كل مادة وصلت إنك لخصتها في جملة حتلاقي في الآخر عندك زي قوالب طوب صغيرة تساعدك فيما يسمي بالتكامل و البناء المعرفي اللي إن شاء الله يخليلك الدنيا متربطة ببعض و يسهل عليك الإبداع.
كتير بنعاني في الكليات في فهم فايدة اللي إحنا بناخده. فلو جيه محاضر قالك علي خلاصة العلم و علاقاته يبقي ممكن يسهل عليك الدنيا كتير.
لو جينا نفكر كدة حتلاقي أي حاجة بعد ما بتتعلمها بيبقي عندك حاجتين + … :
1. عارف المكان اللي تدور فيه عالحاجة و دي اللي بيقولوا عليها (معرفة مظان العلم نصف العلم)
2. مفاهيم و خلاصة في دماغك بحيث لو سألتك إيه دة ترد في جملة أو في 4 كلمات
3. غالبا في حاجات تانية معرفهاش
مثال:
كنت باخد كورس أونلاين من فترة و كانت حاجة جديدة عليا و شكلها معقد. و أحيانا كنت بشوف الفيديوهات من غير ما ألخص و الاقي الدنيا مش مربطة و مش فاهم العلاقات. لكن لما قعدت الخص اضطريت ارجع لفيديوهات تاني و اشوفها و اكتب و انتقل بشكل غير منظم لإن في حاجات مش متربطة لغاية ما وصلت إني في ورقتين تقريبا كنت ملخص الحدوتة. و ساعتها فعلا حسيت بفرق كبير و رغم إن المحاضر كان بيشرح كويس و كان بيقول أهداف كل فيديو في أوله و في آخره 
لكن حتي الأهداف دي تحس ملهاش طعم غير لما انت تستنتجها بنفسك من المحتوي بعد التلخيص.
لكن حتي الأهداف دي تحس ملهاش طعم غير لما انت تستنتجها بنفسك من المحتوي بعد التلخيص.و عشان كدة:
إوعي تذاكر من تلخيص لإنه ممكن يبقي مش مناسب ليك لإن اللي لخص ممكن يبقي في حاجات بداهية بالنسبة له لكن مش بداهية بالنسبة لك. حاجة كدة عاملة زي ال Puzzle و انت بتتعلم باستفاضة بتبص علي كل جزء في ال Puzzle و علي علاقته باللي جنبه و لما تشوف الصورة كاملة في الآخر بعد تعبك فيها غير لما حد يوريك ال Puzzle معمولة جاهزة. و رؤيتك لصورة ال Puzzle كاملة لا يعني إنك تقدر تعمل زيها. امتي تتأكد إنك تعرف؟ لما تخش و تعوم بنفسك.
اللي جيه بسهولة ممكن يروح بسهولة. Easy Come Easy Go
فأكيد في مجهود في التلخيص بس يستاهل
مثال تاني اتعلمتوا من حد متخصص في الإدارة و هي إن الإدارة في 4 كلمات: هدف – تخطيط (للهدف) – تنفيذ (الهدف) – المهارات (اللي تساعدك في تحقيق الهدف دة)
و العجيب إن في تلخيص كتاب اسمه Peak بيقول إن المحترفين أو العظماء في مجالهم حققوا العظمة بإنهم وصلوا لتمثيل ذهني (مكون من كلمات و صور و مشاعر) سمحلهم ب 3 حاجات :
1. إنهم يعيدوا تجربة تجاربهم في دماغهم
2. يتوقعوا بدقة أحداث متتالية ورا بعض في تخصصهم
3. ضغط كتير من المعلومات في التوصيف أو التمثيل الذهني دة
فالتمثيل الذهني دة هو اللي بيفرق الخبراء عن المبتدئين
و الخرائط الذهنية ممكن تسهل عليك التلخيص و ممكن تقرا كتاب The Mind Map Handbook بتاع (توني بوزان) Tony Buzan اللي عمل الخرائط الذهنية أو تشوف فيديوهات عال Youtube
*** الخلاصة ***
لخص بالخرائط الذهنية ما تتعلمه بحيث تقدر تشرحه لطفل عمره 4 سنوات
و الله أعلم
سبحانك اللهم و بحمدك اشهد ان لا إله إلا انت استغفرك و اتوب إليك
و صَلَّي الله و سَلَّم وبارَك علي سيدنا مُحَمَّد وعلي آله
