بـــــــسم الله الرحمـــــــن الرحيـــــــم
في حاجة أعتقد إنها مهمة جدا بس تقريبا نادرا ما لقيتها في خلال التعليم. اللي حقولوا دي وجهة نظري و ممكن يبقي فيها أخطاء و معرفش دة ينفع لكل الناس و لا لأ.
في مقولة مهمة جدا و هي (لا يجد الإجابة إلا من يؤرقه التساؤل). الإنسان بطبيعته يحب يستكشف المجهول. و من أسباب وجود العلم إنه يجاوب عن أسئلة أو يحل مشاكل و البحث اللي بنلاقيه في الماجستير و الدكتوراة بيبقي مثلا عايز يحل مشكلة ما أو يجاوب علي سؤال ما أو أسئلة.
و بما إن في كتير من العلوم موجودة و أسئلة أصلا متجاوبة و بالتالي بقت أساس بنتعلمه في المدارس و الجامعات. المشكلة بقي في طريقة إلقاء المعلومة إن الواحد أحيانا من كتر المعلومات يزهق و يبقي حب الإستكشاف عنده راح و فين و فين بقي علي ما يلاقي حاجة يلاقي نفسه حابب يعرف فيها أكتر و لو لقاها إيه إحتمال اللي بيعلمه الحاجة دي يديهاله بشكل كويس؟
متهيألي أفضل إننا ندرس مع المعلومات هم إزاي وصلوا للمعلومات دي و إيه الأسئلة و المشاكل اللي المعلومات دي حليتها.
إحنا لا نعاني من نقص المحتوي العلمي بالذات في العصر دة لكن نعاني من وجود العقلية المتميزة المتمكنة في مجالها اللي دائما بتسأل و بتدور علي أجوبة من خلال تجاربها و من خلال اللي الواحد بيتعلمه. و أعتقد دة من ضمن عدم أسباب انتهاء التعلم بالذات للعلماء. فكل يوم يبقي في جديد و مفيش يوم زي اللي قبله و الإنسان يزداد عمقا و ثراء لأنه اتعلم إزاي يسأل و إزاي يدور عالمعلومة و عمال يلاحظ و يستنتج و هكذا. و في مقولة (يظل العالم عالما حتي إذا ظن انه علم فقد جهل) و كإن اللي خلاهم علماء إنهم عارفين إنهم مش عارفين يعني في أسئلة عندهم مش متجاوبة سواء بقي الإجابة موجودة ولا لأ و بيدوروا عالإجابة.
تخيل إنك صاحي الصبح و مفيش عندك أي سؤال عايز تجاوبه؟ يوم ورا يوم بيعدي و انت مبتتعلمش حاجة جديدة مفيش سؤال فمفيش إجابة بتدور عليها. حاول تسأل و بالذات أسئلة جوهرية تلمسك من جوا و دور عالمصدر الصحيح و اتعلم و عيش حياة تانية تكون مساهم في حل مشاكل و إجابة أسئلة.
أنا اعتقد إن أي حد في أي مجال ممكن يبقي أفضل و يحسن من أدائه بس هو يحاول يساعد و يدور علي حلول.
أنا معرفش إزاي ممكن المناهج تتعمل بالشكل دة. و لكن كأسلوب حياة و حتي و انت بتتعلم ممكن تعمل الآتي:
١. اسأل أسئلة عميقة في مجالك و غيره
٢. اتأكد إن اللي بتاخد منه مصدر موثوق و شوف أهل التخصص و المصادر المعتمدة و إلا ممكن تلبس لابسة مش حلوة
٣. دور علي حلول و أجوبة للأسئلة
