tree, clouds, fields-832079.jpg

٨. مهارة التعريف والتصور

بـــــــسم الله الرحمـــــــن الرحيـــــــم
 
التعريف شئ أساسي في أي علم و ليه شروط عشان يبقي تعريف مظبوط.
 
طاب ماهو كدة كدة جاهز؟ فايه لازمة اني اعرف شروط التعريف؟
 
الإجابة في إنك تغير نظرتك للعلوم اللي بتتعلمها. مش معني إن الحاجة جاهزة إني اخدها زي ما هي و خلاص. اعتقد إن مهم إني اري العلوم كإني قاعد معاهم و هم بيستكشفوا العلوم فبإدراكك للتفاصيل دي تاخد شوية فوائد منها الآتي:
 
1. يزيد عمقك في الفهم و بالتالي يزيد احتمالية إتقانك
2. زيادة عمق الفهم يساعدك في إنك تعرف إذا كانت ميولك حقيقية ولا انت مش فاهم عشان كدة مش حابب تعرف. ممكن بسبب سوء أساليب التعلم تشوف الذهب حجر عادي فبالتالي يفوت إدراكك للحقائق و تنظر للعلم نظرة سطحية و يفوتك جواهر العلم
3. إنك يبقي عندك عقلية مرتبة سهل عليها إدراك و فهم بل و إنتاج العلوم فيساعدك في التحول تدريجيا من متعلم عادي لمتعلم أكثر عمقا و فهما
 
بالمناسبة تعرف التصور و حاجات أخري مفيدة كتير بتتدرس في علم المنطق و المنطق من علوم الآلة أو الوسائل يعني أداة تساعدك في حاجات كتير و منها تجنب المغالطات المنطقية (يعني ممكن حاجات شكلها صح و منطقية و هي مش صح ولا منطقية أصلا يعني زي ما تقول كدة اتضحك عليك)
 
إيه بقي شروط التعريف الصحيح:
1. أن يكون جامعا: يعني جامع لكل الحاجات اللي عايز أدخلها في التعريف دة
2. أن يكون مانعا: يعني يمنع دخول حاجات مش من التعريف في التعريف. يعني دقيق كفاية بحيث يبقي عامل زي السور اللي فيه حاجات معينة لا يدخل حاجة مش فيه فيه و لا يخرج حاجة فيه براه
3. ألا يشتمل التعريف علي ألفاظ مشتركة
4. أن يكون الْمُعَرِّف أظهر من الْمُعَرَّف
5. أن يكون خاليا من المجاز إلا بقرينة أو يكون مجاز مشهور
6. ألا يشتمل علي دور. و الدور من المستحيلات العقلية.
7. ألا يشتمل علي حكم عالحاجة اللي انا باعرفها. لإن الحكم علي شئ فرع عن تصوره (يعني مش حعرف أحكم علي حاجة غير لما اتصورها و افهم معناها) . فإزاي و انا باعرفلك حاجة اديك حكم عليها و انت يادوباك بتحاول تفهم إيه الحاجة دي؟
 
أنا عارف إن في حاجات ممكن تكون مش واضحة في شروط التعريف. أنا وضحت حاجات بسيطة أما الباقي حاسس إن توضيحي مش حيبقي دقيق كفاية. فأفضل تسأل متخصص لكن أنا باشاور بس.
 
و أرجو إن يبقي توضيحي لبعض الشروط بسطها بشكل غير مُخِل. بس طبعا وارد يبقي في تفاصيل أكتر من اللي انا وضحته. باردو ارجع لمتخصص. و نصيحة لما تتعلم العلم لازم تتعلم من متخصص و إلا سهل أوي تضل و تبقي فاكر نفسك فاهم و انت مش فاهم او اللي فهمك مكانش فاهم أصلا 😃. و باكرر إني بس باشاور.
 
و الله أعلم
سبحانك اللهم و بحمدك اشهد ان لا إله إلا انت استغفرك و اتوب إليك
و صَلَّي الله و سَلَّم وبارَك علي سيدنا مُحَمَّد وعلي آله
Subscribe
Notify of
guest
0 Comments
Inline Feedbacks
View all comments