snail, shells, pattern-65358.jpg

٤. مهارة التصنيف

بـــــــسم الله الرحمـــــــن الرحيـــــــم

مقدمة

هي إيه هي العلوم و إيه تعريفها و علي أساس إيه اقول إن الموضوع دة تبع العلم دة و لا لأ؟ و اللي اكتشفوا العلم إزاي اكتشفوه و إزاي بيفكروا؟
جزء من الإجابة في رابع مهارة من مهارات التعلم و هي (مهارة التصنيف)
 

مهارة التصنيف

أنا عارف إن العلوم متصنفة جاهزة بس ليه هي متصنفة كدة؟ يعني إيه معيار إن شئ ما أو موضوع ما يندرج تحت العلم دة أو لأ؟ السؤال دة بيخلينا نفهم موضوع العلم بشكل أعمق و نفهم شوية عن عقلية الناس اللي حاطين العلم دة

كمثال يعني اللي اعرفه إن العلوم بشكل عام حوالي اربعة: علوم طبيعية و لغوية و شرعية و إنسانية. جوا العلوم الطبيعية نلاقي الفيزياء و جوا الفيزياء نلاقي الميكانيكا و الديناميكا و الكهرباء و المغناطيسية و غيره. السؤال بقي إيه هي الفيزياء و إيه اللي يخلي الحاجات دي تبعها؟ ببساطة الفيزياء بتحاول تحلل و تفهم الطبيعة و توصفها و كمان تتنبأ بيها بدقة تنبؤ معينة لإنها تبع العلوم الطبيعية

و في الحضارة الغربية ليهم تقسيمة للعلوم شوية مختلفة فعندهم العلوم و العلوم الإنسانية. ايه بقي الفرق ما دة علم و دة علم. قالك حسب درجة التنبؤ و دقته فلو التنبؤ عالي يوصل مثلا ل ۹۰% دقة يبقي علم لكن لو صعب التنبؤ مثلا يوصل مثلا ل ٤۰% يبقي دة تبع العلوم الإنسانية يعني مش قادر يقول عليه علم بس. زي الفلسفة و علم النفس و الحاجات اللي صعب تقول النتيجة حتبقي إيه و يمكن علم الإجتماع داخل معاهم علي ما أتذكر. أنا بقول مثلا لإني مش فاكر النسبة تحديدا

متهيألي كدة وضح سؤال تصنيف العلوم بيساعدك تفهم العلم بشكل أعمق إزاي

خد عندك كمان إن في حاجة اسمها العلوم البينية؟ يعني مثلا في حاجة اسمها (الإحصاء الحيوية) و كإن لقوا علاقة بين علم الإحصاء و علم الأحياء. زي ما تقول شافوا العلوم بمنظور مختلف خلاهم يشوفوا إن في علاقة بين علمين أو يقدروا يستفيدوا من علم في علم تاني لدرجة إن اكتشفوا علم جديد بتصنيفات جديدة

تدريبين عمليين على مهارة التصنيف

١. تحاول مع نفسك تصنف الحاجات اللي بتتعلمها قبل ما تعرف التصنيف الجاهز. و عشان تعرف تصنف لازم تبقي فاهم التعريف الكلي كويس قبل ما تبدأ

مثال: لو درست مثلا ميكانيكا تسأل إيه هي الميكانيكا الأول؟ حتلاقيها جزء من الفيزياء بيدرس الأجسام و حركتها و القوي المؤثرة عليها. دة التعريف الكلي. طاب تعتقد نقدر نقسم الميكانيكا أكتر؟

أيوا ممكن ما هي القوي دي ممكن تخلي الجسم يتحرك أو متخليهوش يتحرك. يبقي في جسم ثابت و يطلع منه علم استاتيكا و جسم متحرك فتلاقي علم الديناميكا

طاب يا تري إيه الشعرة اللي تفرق عشان اقول الجسم دة حيتحرك ولا لأ لو أثرت عليه بقوي؟ حتلاقي لازم يكون في إتزان عن طريق مثلا دعامات تمنع الحركة في مختلف الإتجاهات حسب انت عايزه متزن في أني مستوي و هكذا. طاب إزاي بقي أوصف الكلام دة حتلاقي الرياضيات داخلة معاك و هكذا

طاب افرض أنا عايز أدرس الحركة من غير مادخل القوي معايا يطلعلك علم الكينماتيكا

فبالشكل دة تلاقي نفسك بتفهم الحاجة بشكل أعمق. و أيان كان المحاضر وضح الحاجات دي أو مش عارف إنه الأفضل يوضحها أو نسي أو فاكرك عارفها تبقي انت مظبط نفسك

و علي فكرة مهارة التربيط دي مهمة جدا مش بالضرورة تبقي كل الناس عارفاها بس بتخلي الواحد عنده تكامل و بناء معرفي متأسس كويس بدل ما هو بيذاكر كل حاجة عشان الإمتحان و ميعرفش هي إيه علاقتها باللي بياخده و يمكن يكون ميعرفش هو قاعد في المحاضرة بيعمل إيه

و اعتقد إن مع كتر الممارسة ممكن تلاقي نفسك بتعمل كدة تلقائيا و بقيت بتعرف تتعلم أوتوماتيك بشكل أفضل و انت مش واخد بالك زي ما اتكلمت عن مراحل المهارات قبل ما اتكلم عن المهارات نفسها

أنا مكونتش بذاكر كدة لإني عرفت الحاجات دي متأخر من حوالي شهرين تلاتة كدة

٢. حاول تخلي التصنيف عادة يعني بتعملها و بتمارسها في حياتك بشكل متكرر. لإننا دائما بنتعلم حتي و إحنا في الشارع ماشيين بس انت اللي ممكن تبقي مش واخد بالك

يعني مثلا لما كتبت قبل كدة في المنشور اللي اتكلمت فيه عن مهارة القياس عن جوانب الإنسان المختلفة من روحانية، جسدية، مهنية، أسرية، إجتماعية، و ذاتية دة تصنيف

ممكن مثلا تصنف أنواع الأخلاق و علاقتها ببعض و تخلي الموضوع ممتع زي الغضب ممكن ييجي مع قلة الصبر و الحلم مع العفو لأن التأني بيساعدك تفكر قبل ما تاخد قرار فبالتالي يقل خطأك و هكذا

خاتمة

شكرا لكم. آمل أن يكون هذا المنشور مفيدًا لكم. سأكون شاكِراَ لأي تعليقات إذا احتاج أي شخص إلى مزيد من التوضيحات أو أن يخبرني أي شخص إذا رأى شيئًا خاطئًا في ما  كتبته من أجل تعديله، وسأكون شاكِراَ أيضًا إذا كانت هناك أي إقتراحات للتحسين. نحن بشر، والأخطاء مُتَوَقَّعَة مننا، ولكن يمكننا أيضًا تقليل هذه الأخطاء من خلال التعلم منها والسعي لتحسين ما نقوم به

و الله اعلم
سبحانك اللهم و بحمدك اشهد ان لا إله إلا انت استغفرك و اتوب اليك
و صَلَّي الله و سَلَّم و بارَك علي سَيِّدِنا مُحَمَّد و علي آله
Subscribe
Notify of
guest
0 Comments
Inline Feedbacks
View all comments