٩. مهارة التراكم المعرفى

بـــــــسم الله الرحمـــــــن الرحيـــــــم
 
العلم دة عامل زي البناء و انت ماشي بتبني طوبة ورا طوبة و تستني تنشف و تاخد وقتها فيطلع معاك بناء قوي متماسك. ,و مهارة التكامل المعرفي هي إنك تعامل تعليمك زي البناء فتبني بدل ما تاخد شوية معلومات و السلام.
 
المهارة دي كتير بنفتقدها و في ناس بتبص للعلوم بشكل أحادي أو إنها مادة و السلام لكن الأمر أعمق من كدة بكتير.
 
تقريبا بعد الثورة الصناعية التعليم خد جزء من الطابع بتاع التصنيع و غالبا دة كان بحسن نية يعني الهدف إننا نطلع ناس تشتغل في المصانع و نبقي عارفين هم أتعلموا ايه و نعمل نوع من نظام موحد في العالم إنك في كل مرحلة في التعليم الأساسي المفروض تكون اتعلمت إيه اللي هم ال 12 سنة بتوع المدرسة. و كإن عندك منتج المفروض يطلع بعد وقت معين عشان يفيدنا في المصانع.
 

لكن النموذج دة ظهر فيه كذة مشكلة منهم:

  1. إن الناس مختلفة و استيعابهم مختلف فلازم نراعي إن كل واحد يبقي فاهم مش إنه يعدي ب 50% لإن لما يعدي مثلا ب 70% فدة معناه إن في 30% هو فاقدهم فبعد كدة لما يظهرولوا بعد كدة أثناء بقية التعليم ممكن يظن إن المشكلة فيه رغم إن المشكلة إنه مخدش وقت كافي لاستيعاب الحاجات المهمة و كإنك طالع ببناء أساسه ضعيف فمع الوقت يقع البناء و يتهدم و الإنسان يحس إنه متعلمش حاجة و تطلع شريحة من الناس غير متقنة لعملهم.
  2. إن الإبداع قل لأن في طلبة مش ملاحقة تهضم اللي بتتعلمه.
  3. إن بعض الناس طالعة غير مؤهلة لافضل شغلانات ليها لإن كتير من الوقت ضاع في تعلم حاجات بشكل غير متقن فبالتالي كإن بعد التعليم لسة مش عارف انت ايه ممكن يبقي مجالك لإنك اتعلمت حاجات مفهمتاش بشكل كافي يخليك تحكم الحاجة دي مناسبة ليك ولا لأ بل و ممكن يبقي في مجال كويس ليك بس بسبب سوء التعليم كرهت مواد معينة ممكن كنت تحبها لو اتعلمتها صح و عشان كدة مهم جدا مهارة تعدد مصادر و مراجع التعلم عشان تقرب من النظرة الحقيقة للي بتتعلمه.
فمهم جدا يتغير إصطلاح الحصول علي المعلومة لإصطلاح بناء المعلومة و تربط بين العلوم اللي بتتعلمها عشان يبقي عندك أساس متين. و لإن تقريبا اي علم فيه تراكم يعني التراكم هي سمة العلوم فلو انت مش مربط الدنيا ببعضها تخسر كتير من أبواب العلم و فرصه.
 
فالمهارة دي إن شاء الله ترفع كتير من قدرتك علي التعلم و تفتح لك الآفاق بالأخص لما تندمج مع مهارة التراكم المعرفي و دي المهارة اللي ناوي اتكلم عنها إن شاء الله في المنشور الجاي.
 

تدريبات عملية:

  1. شوف اي علم بتتعلمه و اعمل خريطة ذهنية لعلاقاته ببقية العلوم و لو انت في الكلية ممكن يبقي في سنين تخصص ممكن آخر سنتين مثلا و قبلها مواد تبنيلك أساس في كل التخصصات فشوف التخصصات المختلفة و حاول تتفرع منها لأساسياتها و تشوف ازاي التخصصات دي مبني علي اساسياتها
  2. شوف اللي انت عارفه و اللي مش عارفه في الخريطة دي و شوف ايه اللي وصلتله و ايه اللي ناقصك و إزاي حتبني اللي انت واقف عليه عشان توصل للإتقان و طبعا ياريت تستعين بأهل التخصص و تتأكد إذا كنت شايف الصورة صح ولا لأ. الإسترشاد بالشخص المناسب يمكن يوفر عليك 90% من مصاعب الطريق.
  3. شوف نقاط ضعفك في اللي بتتعلمه و راجع الحاجات المناسبة لتقوية نقاط الضعف دي
  4. مع وجود الإنترنت بقي اسهل كتير ترجع للي ناقصك فاستفيد منه و اتأكد من موثوقية المصادر و اوعي تنسي تسأل متخصص الأول باردو.
  5. لو انت مش في كلية أو في مدرسة ممكن تمشي بالسرعة المناسبة ليك بحيث تهضم اللي بتتعلمه
بعض من الأفكار اللي هنا واخدها من فيديوهين ل (سال خان) (Sal Khan) اللي عامل خان أكاديمي و دييتردس كتير أوي من المواد من اول ابتدائي لغاية شوية من الجامعة و ببلاش و شرحه فعلا جميل. و دة رابط الفيديوهين واحد بيتكلم عن تاريخ التعليم والتاني فيديو ليه بيتكلم في TED.
 
و الله أعلم
سبحانك اللهم و بحمدك اشهد ان لا إله إلا انت استغفرك و اتوب إليك
و صَلَّي الله و سَلَّم وبارَك علي سيدنا مُحَمَّد وعلي آله
Subscribe
Notify of
guest
0 Comments
Inline Feedbacks
View all comments