١١. مهارة إدراك العلاقات

بـــــــسم الله الرحمـــــــن الرحيـــــــم
 
أولا مهم إن الواحد يبقي مدرك إن عادة الأشياء في العالم مكونة من أجزاء و الأجزاء دي عن طريق التضافر مع بعض بشكل معين بنلاقي المنتج الأخير اللي شايفينوا أودامنا دة. فالعلاقات بين الأشياء كدة كدة موجودة لكن الفكرة في إننا إزاي نشوف العلاقات دي.
 
خصوصا إننا دلوقتي في عالم كتر فيه جدا التخصصات البينية و الأكثر من البينية يعني تخصص داخل فيه ممكن 4 أو 5 تخصصات مع بعض و لما دخلوا مع بعض طلع تخصص جديد يحل مشاكل جديدة لدرجة إني سمعت من قريب إن اللي مش حيبقي عنده حتة التكاملية و إنه يبقي عنده خلفية ولو عن حاجات بسيطة مختلفة، طبعا مع إتقانه لتخصصه، ممكن يعاني في الفترة اللي جاية بسبب التطور الكبير في العالم في العلوم البينية.
 
طاب إزاي ممكن اكتسب المهارة دي؟ أنا فاكر إني قرأت في كتاب Think!: Before It’s Too Late بتاع Edward de Bono إنه قال حاجة شبه كدة إنك مثلا لو انت مروح من الشغل للبيت و بدأت من مكان مختلف عن المكان اللي متعود تبتدي منه ممكن توصل لأنك تلاقي سكة أسرع في الوصول لبيتك. فهو كان بيستدل بدة في فكرة الإبداع إنك تبتدي من كلمات عشوائية و تحاول توصل للحل عن طريق الكلمات الغريبة اللي تبدو إنها ملهاش علاقة بالحل و العجيب إنك ممكن توصل لأفكار صعب كنت توصلها غير لو بدأت من مكان مختلف في بداية تفكيرك عن المكان اللي انت متعود تبتدي تفكر منه.
 
فكتدريب عملي علي المهارة دي إنك تبتدي تسأل أسئلة عن العلاقة بين أي شئ و شئ آخر سواء و انت بتتعلم بحيث تربط الأشياء بطريقة جديدة فتسهل الدنيا عليك او و انت بتحاول تحل مشكلة مثلا مش لاقيلها حل و إن شاء الله مع التدريب تنمو المهارة دي معاك و تلاقي نفسك بتدرك علاقات غير واضحة بين أشياء ضخمة.
 
و الله  اعلم
سبحانك اللهم و بحمدك اشهد ان لا إله إلا انت استغفرك و اتوب إليك
و صَلَّي الله و سَلَّم وبارَك علي سيدنا مُحَمَّد وعلي آله
Subscribe
Notify of
guest
0 Comments
Inline Feedbacks
View all comments