١، ٢ مهارتي الملاحظة والوصف

بـــــــسم الله الرحمـــــــن الرحيـــــــم

مقدمة

إن شاء الله ناوي اتكلم في الفترة اللي جاية عن بعض مهارات التعلم الذاتي و هم إن شاء الله ٢٤ مهارة قابلين للزيادة. بعض المهارات مرتبطة ببعض فممكن اتكلم عنهم مع بعض. و إن شاء الله ححاول اكتب نصائح بسيطة عن كيفية التدريب علي المهارات دي

اول مهارتين مرتبطين ببعض هم

مهارتي الملاحظة و الوصف

طبعا أي إنتاج علمي او اكتشاف غالبا بيبقي بدايته بالمهارتين دول. يعني مثلا إزاي كان الإنسان ممكن يوصل للقوانين الفيزيائية غير لما يلاحظ ظاهرة في الطبيعة و يشوف هو ممكن يوصفها إزاي؟ فتلاقي علم الرياضيات داخل معاك كأداة للوصف الدقيق للظواهر العلمية بحيث أشوف أرقام و بالتالي بقي يسهل القياس و التنبؤ و اشوف انا تنبأت صح بأد إيه و كدة يعني
 
أحيانا من الروتين اليومي الواحد ممكن يتحول لآلة شغال في الأوتوماتيك علي طول فيفقد رؤية أي جمال او ظاهرة محتاجة رصد في حياته. المفروض الواحد يتغلب علي هذا بإنه يبتدي يشغل مخه شوية و يشوف إزاي ممكن يطلع من الملل الدائم و يزود كفائته و إتقانه لمهماته المختلفة في الحياة
 

تدريبات عملية لمهارة الملاحظة

١. ممكن نعتبر التدبر في القرآن الكريم من باب الملاحظة

٢. في نهاية كل يوم لاحظ و تتذكر الأحداث اللي مريت بيها، و اوصفها و شوف هل كان في خلل في سلوكك خلال اليوم ولا لأ؟ و ممكن تسأل اقرب الناس ليك عن اللي ملاحظينه من سلوكياتك و تشوف إزاي ممكن تحسن من نفسك. مجرد مراقبتك لنفسك ممكن يوضحلك مشاكل كتير فيك مكونتش مركز انها موجودة أصلا و دة من باب المراقبة للنفس اللي هي مهمة جدا. راقب هل نظرتك عن نفسك صح ولا لأ من خلال سلوكياتك و اللي حواليك شايفينك إزاي و انت نيتك ايه. أيوة حاول تخش جوا نفسك و تفهمها أكتر و تفهم حقيقتها اللي ممكن تبقي مخبياه عليك

٣. في مجال عملك حاول تلاحظ أحسن الناس في مجالك و عشان تطور أي مهارة عندك بشكل أسرع عموما حاول تلاحظ الناس الجامدين اوي في المجال بيعملو ايه و إيه اللي بيتعلموه و إزاي شغلهم بيطلع بالجودة العالية دي. حاول تفك أعمالهم لأجزاء بسيطة مع انك تحاول تشوف الفرق بينك و بينهم في التفاصيل الدقيقة دي عشان ترتقي بمستواك فتبقي أكثر إتقانا لعملك

٤. لو انت بتذاكر حاول تنظر للصورة الكبيرة و تنظر للتفاصل و تلاحظ انت فين في المنهج بتاعك و إيه اللي إن شاء الله حتتعلمه. زي تعمل خريطة ذهنية للمادة او المواد و تربط الدنيا ببعض فعلا ممكن تفرق معاك جامد.

٥. لو انت متزوج او عندك ابناء او مع أي شخص بتحتك بيه كتير حاول تلاحظ ايه سبب وجود أي سلوك مش كويس في الشخص اللي اودامك و شوف إزاي ممكن تتعامل معاه بحكمة بحيث تطلع منه أحسن ما فيه. طبعا ممكن تلاقي كتب عن علم نفس المرأة و علم نفس الرجل و علم نفس النمو للطفل و إزاي تتعامل معاه في مراحل نموه المختلفة و حتي علم نفس المسنين (اللي هم الناس الكبيرة) ممكن تساعدك كتير. لأن سلوكك مع الشخص بيفرق جامد مع محاولة تنبيه الشخص و نصيحته بشكل جميل. و طبعا لنا في رسول الله (صلي الله عليه و علي آله و سلم) أسوة حسنة. تعلم سيرته و شوف إزاي خير الخلق كان بيتعامل مع البشر (صلي الله عليه و علي آله و سلم)

طبعا ممكن تزود بقي من نفسك و تفكر في حاجات تانية غير الحاجات دي

تكملة لمهارة الوصف

اولا للوصف أدوات تختلف بإختلاف المجالات. فالوعي و السؤال عن الأدوات المناسبة للمجال مهم جدا. فمثلا لو انت في مجال الهندسة أو العلوم فالرياضيات أداة أساسية تساعدك علي دقة وصف الشئ اللي انت شايفه أو ملاحظته و تحويله لمعادلات أو نموذج رياضي تعرف تتعامل معاه و تتأكد من صحته بالأرقام و التجربة

بما إن مهارة الملاحظة و الوصف مرتبطين ببعض جدا. يعني لو كنت بتتدرب علي مهارة الملاحظة فانك توصف اللي ملاحظه دة بشكل دقيق مهم جدا عشان تعرف تستفيد من اللي لاحظته

فاللي شايفه إن عشان تتدرب علي الوصف محتاج تتدرب علي إتقان الأداة المستخدمة للوصف بس تتدرب عليها بشكل و اعي بحيث تركز عالحتت الضعيفة عندك فتقويها. و تشوف أمثلة كتير لناس كويسين جدا في إستخدام الأداة دي عشان تلاحظ فين محتاج تطور من نفسك و هكذا

فبإختصار شوف الأداة المناسبة للمجال و اتدرب عليها بشكل واعي

خاتمة

شكرا لكم. آمل أن يكون هذا المنشور مفيدًا لكم. سأكون شاكِراَ لأي تعليقات إذا احتاج أي شخص إلى مزيد من التوضيحات أو أن يخبرني أي شخص إذا رأى شيئًا خاطئًا في ما  كتبته من أجل تعديله، وسأكون شاكِراَ أيضًا إذا كانت هناك أي إقتراحات للتحسين. نحن بشر، والأخطاء مُتَوَقَّعَة مننا، ولكن يمكننا أيضًا تقليل هذه الأخطاء من خلال التعلم منها والسعي لتحسين ما نقوم به

و الله اعلم
سبحانك اللهم و بحمدك اشهد ان لا إله إلا انت استغفرك و اتوب اليك
و صَلَّي الله و سَلَّم و بارَك علي سَيِّدِنا مُحَمَّد و علي آله
Subscribe
Notify of
guest
0 Comments
Inline Feedbacks
View all comments