compare, comparison, scale-643305.jpg

٣. مهارة المقارنة

بـــــــسم الله الرحمـــــــن الرحيـــــــم

مقدمة

كتير نلاقي تشابه بين الأشياء فلما نقارنهم ببعض ممكن نجيب حاجات من هنا و نحطها هنا تساعدنا في فهم الأشياء و علاقتهم ببعض أو حتي لتبسيط المعلومة. و دة بيساعد في التعلم إنك تدي مثال لحاجة مبهمة بحاجة واضحة بالنسبة ليك و فعلا تلاقيهم قريبين من بعض جدا لدرجة إني فاكر (بس مش متأكد من صحة الكلام دة) إن أينشتاين كان بيحاول يجيب نظرية واحدة لكل شئ لعله رأي كثير من التشابه بعد درجة العلم اللي وصلها

مهارة المقارنة

مثال بسيط لاستخدام المقارنة هو التمثيل أو التجانس يعني مثلا عشان تمشي كهربا في سلك محتاجة فرق جهد لأن الكهرباء بتنتقل من الجهد العالي للمنخفض فممكن نمثل فرق الجهد دة بفرق الضغط و ناخد المياه كمثال فعشان المياه تمشي بتمشي من الضغط العالي للمنخفض فالماتور بيضغط المياه عشان تمشي في المواسير فتلاقي الدنيا بقت أسهل معاك لأن الضغط تخيله أسهل من تخيل جهد الكهربا. و كمان نمثل التيار الكهربي بكمية المياه فكلما زاد فرق الجهد أو فرق الضغط زاد التيار الكهربي أو كمية المياه اللي بتعدي مع إعتبار إن المقاومة ثابتة أو الجزء المسدود في الماسورة مش بيتغير ولا حد بيشيل الإنسداد دة.

أحيانا ممكن تعمل تمثيل زي كدة و بعد شوية تحس إنه مش نافع بعد ما عرفت أكتر عن الموضوع اللي عامله تمثيل يبقي عادي شيلوا و جيب تمثيل غيره و شغل مخك عشان تسهل الأمور علي فهمك

كمان المقارنة عموما بتساعدك في إنك تشوف مزايا و عيوب كل نظرية أو كل نموذج حل أو فرضية. فتشوف إيه الأنسب للتطبيق بتاعك و تستخدمه

بُعد آخر لمهارة المقارنة

بعد آخر لمهارة المقارنة هي إن يكون عندك مرجع أو قدوة في مجالك عايز تتعلم منه و تحاول تشوف جانب حياته اللي ليه علاقة بمجالك عامل إزاي اللي خلاه يبقي قدوة في مجالك. طبعا المرجع الأساسي هو رسول الله صلى الله عليه و آله و سلم فهو اللي نقيس عليه أخلاقنا و المفروض إزاي نعيش و نتصرف

حتي و انت بتتعلم حاجة انت بتنتقل من معلوم لمجهول و كإن المعلوم هو مرجع ليك. حتي في الدوائر الكهربية لازم يبقي في مرجع موحد لكل الأجهزة الكهربية المتوصلة ببعضها و اللي بنسميه أرضي

سبحان الله تحس إن الأنظمة المختلفة في الحياة فيها تشابه كبير فنتعلم بالنظر في الكون (كتاب الله المنظور) و من القرآن (كتاب الله المقروء)

تدريبات على مهارة المقارنة

١. ممكن تقارن بين نفسك في مراحل حياتك المختلفة و تشوف لو في تقدم ولا لأ في إتجاه قدوتك حسب مجالك دة طبعا مع وجود النبي صلى الله عليه و آله و سلم قدوة. مع العلم إنك تبقي راضي باللي قسمه ليك ربنا يعني مقارنة بناءة عشان تعرف إنت ماشي في الإتجاه الصح ولا غلط مش مقارنة تخليك مخنوق عشان لسة موصلتش. كإنك في عربية و عارف إتجاهك بس انت مبسوط و انت في العربية لإنك لو مسوقتش صح في مرحلتك و ماحترمتش مستواك مع التدرج ممكن تلبس جامد
 
٢. أي حاجة صعبة مش قادر تفهمها حاول تعملها تمثيل بحاجة ممكن تبقي شبهها زي مثال الكهرباء و الضغط اللي ضربته في المنشور اللي فات. المهارة دي نفسها ممكن فيها إعتماد علي مهارة الملاحظة و الوصف اللي أتكلمت عنهم قبل كدة و الدنيا مربوطة ببعض لإنك اسهل تجيب أمثلة من كتر ملاحظاتك
 
٣. حاول تحدد أوجه المقارنة عشان تعرف مشاكلك فين. يعني تقسم حياتك لجوانب متعددة و كل جانب تقسمه لمكوناته عشان يبقي اسهل تحديد المشكلة و ياسلام لو عملت قياس في بعض الحاجات بحيث تسهل الدنيا علي نفسك و ممكن ترجع لمنشور القياس لو عايز تاخد فكرة عن إزاي ممكن تعمل كدة
 
٤. و انت بتتعلم شوف النقاط اللي حتتعلمها و قارن بين معرفتك قبل و بعد التعلم
 
٥. ياريت و انت بتقارن تحاول تاخد رأي حد قريب منك عشان ممكن يكون شايف حاجات فيك انت مش شايفها
 

خاتمة

شكرا لكم. آمل أن يكون هذا المنشور مفيدًا لكم. سأكون شاكِراَ لأي تعليقات إذا احتاج أي شخص إلى مزيد من التوضيحات أو أن يخبرني أي شخص إذا رأى شيئًا خاطئًا في ما  كتبته من أجل تعديله، وسأكون شاكِراَ أيضًا إذا كانت هناك أي إقتراحات للتحسين. نحن بشر، والأخطاء مُتَوَقَّعَة مننا، ولكن يمكننا أيضًا تقليل هذه الأخطاء من خلال التعلم منها والسعي لتحسين ما نقوم به

و الله اعلم
سبحانك اللهم و بحمدك اشهد ان لا إله إلا انت استغفرك و اتوب اليك
و صَلَّي الله و سَلَّم و بارَك علي سَيِّدِنا مُحَمَّد و علي آله
Subscribe
Notify of
guest
0 Comments
Inline Feedbacks
View all comments